នៅរសៀលថ្ងៃសៅរ៍ទី ២៤ ខែកញ្ញា ឆ្នាំ២០១១នេះ មានការប្រកួតបាល់ទាត់មិត្តភាពរវាង ថ្នាក់ដឹកនាំ កំពូលរបស់ ប្រទេសកម្ពុជានិងប្រទេសថៃ នៅពហុកីឡ ដ្ឋានជាតិអូឡាំពិក រាជធានីភ្នំពេញ។ ក្នុងការប្រកួតនេះ មានវត្តមានដ៏ខ្ពង់ខ្ពស់ បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណា ចក្រកម្ពុជា និង អតីតនាយក រដ្ឋមន្ត្រីថៃ ឯកឧត្តម ស៊ុមឆាយ វង្សាវត្ថិ ជាប្រធានក្រុមនៃការ ប្រកួតបាល់ ទាត់មិត្តភាព នៃប្រទេសទាំងពីរ។

ការប្រកួតបាល់ទាត់ពិសេសរវាងថ្នាក់ដឹកនាំកំពូលប្រទេសកម្ពុជា និង ថៃនេះមានមនុស្សរាប់ម៉ឺននាក់ចូល រួមចូលទស្សនាស្រែកហ៊ោកញ្ជៀវពេញទីលានពហុកីឡដ្ឋានជាតិអូឡាំពិចដោយក្តីសប្បាយរីករាយបំផុត។

លទ្ធផលចប់ការប្រកួតក្រុមកីឡាករស្លៀកពាក់ឯកសណ្ឋានពណ៌ក្រហមរកគ្រាប់បាល់បានចំនួន ១០គ្រាប់ និងក្រុម កីឡាករស្លៀកពាក់ឯកសណ្ឋានពណ៌ផ្ទៃមេឃ រកគ្រាប់បាល់បានចំនួន ៧គ្រាប់ផងដែរ។

គួររំលឹកផងដែរថាការប្រកួតនេះគឺមិនមានក្រុមណាមួយឈ្នះ ក្រុមណាមួយចាញ់នោះទេគឺគ្រាន់តែជាការ ប្រកួតជាលក្ខណៈមិត្តភាពអន្តរជាតិរវាងថ្នាក់ដឹកនាំកំពូលនៃប្រទេសទាំងពីរដើម្បីរឹតចំណងមិត្តភាព សាមគ្គីភាព និងគ្នាតែប៉ុណ្ណោះ ព្រោះប្រទេសទាំងពីរកន្លងមកធ្លាប់មានរឿងជម្លោះព្រំដែននិងគ្នាតែនៅពេលនេះស្ថានការណ៍ ត្រូវបានធូរស្រាលជាបណ្តើៗហើយ។

ក្នុងការប្រកួតបាល់ទាត់នេះក្រុមអ្នកគាំទ្រអាវក្រហមថៃជាង ១០០០នាក់បានចូលមកក្នុងប្រទេសកម្ពុជា ដើម្បីរង់ចាំទស្សនាការប្រកួតដ៏ពិសេសនេះផងដែរ។